大陸媽媽帶幾歲大囡囡過嚟。囡囡出世冇幾耐就發現雙耳失聰。一路睇緊公家同埋幾個私家嘅耳鼻喉。今年做咗人工耳蝸移植手術。
今次阿媽話囡囡成日頭痛，跟著隊張喺大陸照嘅頸X光片同報告俾我睇。辛辛苦苦睇咗啲殘體字，發現報告話佢冇嘢。阿媽話想幫囡囡攞脊醫轉介信。
等等先，先唔談論香港脊醫嘅質素同規管。頭痛點解要搵脊醫？呀女都冇頸痛引致嘅頭痛。同埋應該搵頭痛嘅成因先。大吉利是如果生腦腫瘤，脊醫幫到你咩？
呢個咁奇怪嘅request好得意呀呵？各位觀眾，一字咁淺，原來阿媽（除咗痴線之外，佢仲）講大話！佢話呀女係冇頭痛冇頸痛。原來佢睇咗咁多香港嘅專科，一直都搵唔到原因點解呀女聽唔到野。佢覺得人哋呃佢，氹左佢兩公婆比呀女做手術。佢自己上網搵資料就話頸椎有問題會做成耳仔神經線出事。所以就自己去照片同埋想搵脊醫搞掂番呀女條頸。
佢咁把炮咁有point，當然搵返耳鼻喉同佢哋發表偉論。結果人哋梗係Ban左佢，話呢件事不大可能發生，所以冇人理佢。佢說服自己話香港醫生係讀主流醫學，唔會識呢啲其他野。所以佢就諗住求其搵個原因過嚟想攞轉介信。但係佢又唔做好啲research，頭痛點攞轉介信呢？
我最後拒絕左佢。勸佢唔好睇脊醫，亦都勸佢唔好胡亂信網上嘅資料。同佢解釋就算俾咗封信你，保險都唔會包。點樣因為失聰所以需要睇脊醫呢？一講到錢，佢個人就好似醒醒地。
我唔知佢會唔會搵第二個醫生試吓第二個原因再去攞封信。但係就算真係俾你睇到脊醫，你如實咁同佢講耳仔嘅事，正常嘅都應該同你講幫唔到你。就算呃你錢一路幫你做治療，你睇到原來係冇進展嘅時候咁咪好戇居？同埋你點解唔返大陸醫？上面一定有個名神叫棍嘅高人幫到你。最多封番封大利是俾佢，到時轉咩運都得。祝你好運。
～～～～
山竹過嚟搵牛肉啦！唔知我講咩就去Fb馬鞍山之友啦。我準備好啲糧食啦，你地呢？🤣🤣
Search